Playing for Refuge proiektuko bazkideak
NAFARROA KOLORETAN
“Nafarroa Koloretan” da Nafarroako Gobernuko Migrazio Politiketako Zuzendaritza Nagusiak duen marka kulturen arteko bizikidetzarako eta arrazakeriaren nahiz xenofobiaren kontra borrokatzeko. Zuzendaritza nagusi horren sentsibilizazio zerbitzuan badira programak eta ekintzak, hots, Atzerritartasunaren arloan arreta eta aholkularitza emateko zerbitzua; arreta eta garapen osoa emateko Zerbitzua, eta Kulturarteko Bitartekaritza Komunitarioaren Zerbitzua, besteak beste.
Halaber, “Nafarroa Koloretan” saria dago, kulturarteko bizikidetzaren aldeko eta arrazakeria eta xenofobiaren aurkako borroka sustatzen dituzten pertsonak edo erakundeak aitortzeko, eta era berean, bizikidetza eta kultur aniztasuna Nafarroako bizikidetzaren eragile gisa nabarmentzen duten ekimenak aintzat hartzeko.
NAFARROAKO BEISBOL ETA SOFBOL FEDERAZIOA
Nafarroako Beisbol eta Sofbol Federazioa irabazi-asmorik gabeko entitate pribatua da, eta beisbola eta sofbola Nafarroako Foru Komunitateko lurralde esparru osoan sustatu eta garatzea da haren helburu nagusia. Federazioa Espainiako Beisbol eta Sofbol Errege Federazioan dago sartuta, eta estatuko Federazioaren ordezkaritza osoa dauka Nafarroan.
2023 urte berezia da Nafarroako federazioarentzat, 75. urtemuga ospatzen ari delako. Ospakizunaren barnean, nazioarteko bi Sofbol eta Beisbol txapelketa eginen dira. Beisbol txapelketa Iruñean eta Burlatan jokatuko da irailean, eta Espainiako selekzioak parte hartuko du. Nafarroako selekzioek leku nabarmena izanen dute ospakizun guztietan, baita bi txapelketa horietan ere.
CEAR
Errefuxiatuari Laguntzeko Espainiako Batzordeak (CEAR) 1979tik hona darama defendatzen bai asilo eskubidea, bai giza eskubideak, eta gerretatik edo GGEEen urraketetatik ihesean datozen errefuxiatuen garapen osoa sustatzen du, eta era berean, asilo eskatzaileen, aberrigabeen eta nazioarteko babesa behar duten eta/edo gizartean bazterturik gelditzeko arriskuan diren migratzaileen eskubideak. CEAR erakundearen eginkizuna da errefuxiatuen, aberrigabeen eta nazioarteko babesa behar duten eta/edo gizartean bazterturik gelditzeko arriskuan diren migratzaileen Giza Eskubideak eta garapen osoa sustatu eta defenditzea. Berrogei urtean baino gehiagoan, CEARek buru-belarri jardun du asilo eskubidearen defentsan eta sustapenean Espainian, eskubide horren aitortzan aurrera egiteko eta nazioarteko babes prozeduran sartzea bermatzeko, legeak dakartzan berme guztiekin.
GURUTZE GORRIA
Gurutze Gorria munduko giza laguntzarako mugimendu herritar eta independenterik handiena da. 1863tik, Gurutze Gorria elkarlanean ari da entitate publikoekin eta pribatuekin, gizatasuna eta duintasuna pertsona guztiengana zabaltzeko edonon, edonoiz eta egoera guztietan. Espainian, Gurutze Gorriak 256.000tik gora boluntario ditu eta 1.250etik gora arreta gune lurralde osoan. Horri esker, urtero, ia 5 milioi lagun artatzen ditu herrialde osoan. 1,4 milioi inguru bazkide, enpresa eta aliaturen babesa dauka gizarteko sektore guztietan, eta beren ezagutza alorretatik ari dira lanean laguntza arloan, osasunean, gizarteratze arloan, hezkuntzan, enpleguan eta ingurumenean.
Gurutze Gorriaren eta Ilargi Erdi Gorriaren Nazioarteko Mugimendua 192 herrialdetan dago ezarria eta beti bere funtsezko zazpi printzipioekin bat dihardu: Gizatasuna, Inpartzialtasuna, Neutraltasuna, Independentzia, Boluntariotza, Batasuna eta Unibertsaltasuna.
LAGUNTZAILEAK
NAFARROAKO KIROL INSTITUTUA
Nafarroako Kirol Institutua erakunde autonomoa da eta hari dagokio Nafarroako Gobernuaren kirol gaietako politika planifikatu eta betearaztea, kirol gaietako eskumenak esleiturik dauzkan Foru Komunitatearen Administrazioko departamentuko titularra goragoko planifikatzaile, zuzendari eta begirale duela.
NKIk kudeatutako kirol jarduerak: eskola kirola, kirola eta emakumeak, bertako kirola, udal kirola, kirol balioen ekintza plana, kirol federatua, kirol asoziazionismoa, kirola eta prestakuntza, kirol errendimendua, unibertsitate kirola, kirol boluntariotza, euskara eta kirola, kirol jarduerak egiteko baimena, eta kirol sariak.
ESPAINIAKO BEISBOL ETA SOFBOL FEDERAZIOA
Espainiako Beisbol eta Sofbol Errege Federazioa (RFEBS) beisbola eta sofbola Espainian zuzentzen dituen erakundea da, 1944ko martxoan sortu zenetik. Lehen izena hauxe izan zuen: Espainiako Oinarrizko Pilota Federazioa.
Lurralde nazional osoan dihardu eta du eskumena, eta autonomia erkidegoko federazioek, kirol klubek, kirolariek, teknikariek eta arbitroek osaturik dago. RFEBS Federazioak emaitzak eta egutegiak gainbegiratu eta plazaratzen ditu. Era berean, nazioarteko lehiaketetan Espainia ordezkatzen duten taldeetako kideen prestakuntzaz eta hautaketaz arduratzen da.