Cardinales taldea nagusi “Slowpitch Playing for Refuge” txapelketan

Ekainaren 20an Errefuxiatuaren Mundu Eguna izan zela eta, ‘Playing for refuge’ Europako proiektuaren bigarren  Family Day eguna egin zen joan den ekainaren 25ean. Jarduera nagusia ‘Slowpitch Playing for Refuge’ txapelketaren azken jardunaldia izan zen.

Jardunaldia Iruñeko Amaia Kirol Hiriko instalazioetan burutu zen, 150 pertsona inguruk parte hartuta. Han izan ziren, besteak beste, Patricia Ruiz de Irizar Migrazio Politiketako zuzendari nagusia; Ernesto Modrego Miguel Induráin Fundazioko kudeatzailea; Álvaro Hurtado Zucamiko CEOa; Arantxa Rubio CaixaBank Gizarte Ekintzako arduraduna Nafarroan; Pablo Naballas Amaya K.H.ko kudeatzailea; Pablo Carpio Nafarroako Beisbol Federazioko presidentea; eta Adrián Laurencena ‘Playing For Refuge’ proiektuko arduraduna.

Bertaratu zirenei ongietorria eman ondoren, ‘Slowpitch Playing for Refuge’ txapelketaren azken jardunaldia jokatu zen, Nafarroako Beisbol eta Sofbol Federazioak antolaturik. Txapelketa iragan apiriletik hona egin da, Nafarroako lau taldek parte hartuta, haien artean Cardinales taldeak, gehienbat gure herrialdean errefuxiatu egoeran bizi diren jokalariek osatuta. Txapelketa arras giro onean jokatu da eta, hain zuzen, harrigarria bada ere, Cardinales izan da txapelduna merezimendu osoz. Ondotik, Arga Ducks, Arga Frogs eta Toros sailkatu dira. Txapelketan buru-belarri lagundu duten nafar kluben ordezkariek eman zioten hasiera jardunaldiari, ohorezko jaurtiketaren bidez. Hauek izan ziren: Javier González Tabar, Argaren izenean; Urko Gutiérrez, Amaya-Jesuitinas taldearen izenean; eta Iñaki Alfonso, Iruñeko Toros taldearen ordezkari gisa.

Goiz osoan zehar, gainera, jardunaldira bertaratu zirenek bateo-makina bat gozatzeko aukera izan zuten, Nafarroako Federazioak kirol barrutian jarritakoa, eta, final handia hasi baino lehen, home run lehiaketa egin zen.
Egunari bukaera emateko, sariak banatzeaz gain, bazkaria egin zen bertaratutako jende guztiarentzat. Tartean, proiektua sustatzeko materiala zozketatu zen.